تزينت ملاعب بطولة أمم أوروبا يورو2012 المقامة حاليا في بولندا واوكرانيا بالجميلات من مختلف دول اوروبا وهو ما احدث حالة الاهتمام من جانب الشباب المصري الذي انشغل بنشر صور حسناوات اليورو علي الفيس بوك لكي يستفزوا بنات مصر كنوع من انواع الانتقام نظرا لهوسهن بنجوم المسلسلات التركية.
وانهالت التعليقات الساخرة و''الالشات'' وعقد المقارانات بين فاتنات اوروبا وبنات مصر سواء من خلال التعليقات او من خلال شخصية ''اساحبى'' الساخرة مما ادى الى مناقشات ساخنة بين الطرفين.
ونبدأ المعركة بتعليقات الشباب فقال'' احمد انور'' الفرق بين بنات مصر وبنات اليورو كالفرق بين موسيقى عمر خيرت ودى جي عمرو حاحا. وقال'' ايمن سمير'' بعد المزز اللي شفنها في يورو 2012 لازم البنات اللي عندنا في مصر صورهم تنزل علي علب السجاير!
واضاف ''هادى عبد العاطى ''اخيرا عرفتوا يابنات نصر معنى كلمة حقد ماسكنلى فى كريم ومهند وعايشين الدور اهو جه اليورو وقلب عليكم المواجع وحسسكو انكو ولا شئ.
ونشر رامي خيري علي صفحته خبر بعنوان عاجل: مسيرات نسائية تجوب شوارع القاهرة تطالب بوقف بث مباريات بطولة اوروبا 2012
وسخر مدحت سامى قائلا ''الي كل بنت مصرية ولا يهمك خلي عندك ثقه فنفسك الحلاوة حلوة الروح...روح''.
بينما قال ايمن رمضان '' ناس ليها افريقيا.. وناس ليها اوروبا.. حسبي الله ونعم الوكيل''.
وقال يوسف سلامة'' مش عايز اشوف اى بنت مصرية بعد الى احنا بنشوفه ده احنا هنخش الجنة عشان مستحملين الاشكال الفضائية الى عايشة معانا''.
وسخر اسلام نور الدين واضعا صورة لشخصية اساحبي يقول ''عشان انا مصرى بجد مش هقول على البنت المصرية يع ''.
واضاف احمد قاسم ''بعد بنات اليورو حاسس انى متجوز صاحبى''
وقال بدر السيد '' لو الاخوان هيلغوا المواقع الاباحية مش مهم احنا عندنا اليورو والجزيرة الرياضية ''
ويأتى رد الطرف الاخر من المعركة وهم بنات مصر الذين شنوا هجمات صريحة بقولهم ان للاسف شباب مصر معندهمش مراية فعشان كده مش عارفين حقيقتهم.
فقالت منى السيد ''بنات اليورو بيقلعوا وبيظهروا جمالهم وبيتمتعوا بحرية شخصية دون تعرض اى حد ليهم ولو حتى بنظرة انما هنا التحرش وصل لحده فى الشوارع لدرجة ان البنات بتخاف تخرج من البيت بسبب شباب مصر العظيم الى بيتريق على بناته''.
واضافت ناريمان محسن ''ان الامر متساوى بنات اوروبا جميلات بالفعل وشباب اوروبا برضه اثارة وجاذبية مش زى اشباه الرجال اللى عندنا''.
ووافقتها فى الرأى نجلاء فتوح ''مش عارفة انا ليه الشباب في مصر بيتريقو على الشكل وكل واحد فيهم فاكر نفسه توم كروز او براد بيت او انريكى اجلاسياس!''.
كما وجهت سارة سمير رسالة لصفحة أساحبى قائلة'' بنات مصر خط احمر اساحبي.. مش كفاية المسلسلات التركي اللي عرفتنا حقيقيتكو يامخلفات الحرب المصدية''.
واضافت نيللي سالم ''سخرية شباب مصر من بناتها تأتى لتفاهة الشباب لانهم يفكرون فى الشكل فقط انما البنات سبب اعجابها بكريم او مهند مش لوسامتهم المفرطة واجسادهم المتناسقة او لفحولتهم بل لتعاملهم اللطيف مع من يحبوهم والرومانسية الحالمة التى تفقتدقها بنات مصر شكلا وموضوعا''
وقالت سلوي محمد'' كل واحد بيحط صورة لبنت عاجباه في اليورو وبيتريق علي بنات مصر احب اقوله الست الوالدة منين يا كابتن!!؟
وقالت منة شوقى ''بنات مصر عندها حياء ولو تخلت عنه لاصبحت احلى منهم وقدام الشباب عجبها كده يبقى تخلى اخواتهم البنات وقريباتهم يلبسو ملابس عارية ويعرضوا اجسامهم امام الجميع ..ياخسارة كنت فاكرة شباب مصر رجالة''.
وسخرت هند نبيل قائلة ''ان ايام الفراعنة كانو بيرموا الجميلات من البنات قربان للاله حابي اللي هو النيل عشان الرخاء و هو سر الحياة و مش بس كده, دول كانو بيرموا كمان حيوانات وفواكه, الحاجة الوحيده اللي مكانوش بيرموها هي الرجالة المصريين لأن لو كانو عملو كده حابي كان هيشيل مصر من ع الخريطه بفيضان واحد''.
كما قامت مجموعة من بنات مصر بنشر رسالة عبر موقع التواصل الاجتماعى الفيس بوك لشباب مصر يعترفون فيها بأن بنات اليورو ''حلوين'' ولكنهم يؤكدون علي انهم قادرين على ان يكونوا مثلهم.
واشاروا إلى ان كل فتاة من اليورو تنزل من منزلها وهى ترتدى افضل الملابس وتكون فى ابهى مظهر وهى واثقة بأنه لن يعترضها أى شخص ويقول كلمة ''قذرة'' بحد وصفهم.
واضافوا ''كل واحدة في بنات اليورو راسمة على وشها أحلى ابتسامة وتضحك من قلبها وهي مش خايفة من واحد زيك يفكرها بتبتسمله ويروح يقولها ماتيجى''.
واختتمت بنات مصر رسالتها إلى الشباب ''عرفت بنات اليورو حلوين ليه علشان مبيشوفوش أشكالك''.
كما جاءت اراء كثيرة من الفتيات والشباب تطالب بعدم عرض صور فتيات اليورو العارية لانه سيحسب فى ميزان اعمالنا وان نشر مثل هذه الصور ما هو الا سيئات جارية لمن ينشرها ومن شأنها ان تشيع الفاحشة بين الشباب ولابد من مراعاة الدين فى كل شئ.
ليست هناك تعليقات:
إرسال تعليق